Міндетті әлеуметтік медициналық сақтандыру жүйесінің қызмет етуі туралы мақсатты аудиторияның хабардарлығын арттыруға бағытталған білім беру жобасы аясында Әлеуметтік медициналық сақтандыру қоры серіктестік бастамаларын кеңейтуді жалғастыруда. Осыған орай, 17 сәуірде Қор мен Орталық бухгалтерлер үйі арасында өзара ынтымақтастық туралы меморандумға қол қойылды. Келісімде МӘМС үшін аударымдар мен жарналарды төлеу тәртібі бойынша білімді арттыруға бағытталған бірлескен білім беру іс-шараларын іске асыру көзделген.

Тәжірибелік семинарлар өткізу – қол қойылған меморандум аясындағы ынтымақтастықтың негізгі бағыты.

«Орталық бухгалтерлер үйімен ынтымақтастық – кәсіби қауымдастықты тарту жолындағы маңызды қадам. Мұндай серіктестік арқылы біз ақпараттық қолдауды күшейтіп, мамандардың дайындығын арттырамыз», – Әлеуметтік медициналық сақтандыру қоры басқарма төрағасының орынбасары Индира Сәркенова деп атап өтті.

Өз кезегінде Орталық бухгалтерлер үйінің директоры Альмира Шарафутдинова білім беру бастамаларының маңыздылығына тоқталды:

«Әлеуметтік медициналық сақтандыру қорымен ынтымақтастық орнату – біз үшін үлкен мәртебе. Бірлескен жұмысымыз МӘМС жүйесі бойынша мамандардың білімін тереңдетуде маңызды рөл атқарады деп сенеміз. Жарналарды төлеу тәртібі мен есептеу механизмдерін түсіндіруге бағытталған білім беру іс-шаралары бухгалтерлерге қолданыстағы нормаларды жақсы түсініп қана қоймай, оларды кәсіби қызметінде тиімді пайдалануға мүмкіндік береді».

Есеп және салық саласы бойынша жетекші білім беру орталықтарының бірі ретінде Орталық бухгалтерлер үйі кәсіби қауымдастық арасында МӘМС туралы өзекті ақпаратты таратудың сенімді серіктесіне айналады. Меморандум аясында тұрақты бірлескен іс-шаралар өткізу және сараптамалық өзара іс-қимылды дамыту жоспарланған.

Ал 18 сәуір күні осы меморандум аясында алғашқы вебинар өтті. Онлайн іс-шараға 100-ден астам бухгалтер қатысты. Қатысушылар жарна төлеу, Қормен өзара әрекеттесу мәселелері бойынша толық ақпарат алды.

Қор еліміздің жетекші білім беру ұйымдары және кәсіби бірлестіктерімен белсенді ынтымақтастықты жалғастыруда. Айта кетейік, алғашқы МӘМС кеңесшілерін даярлау бойынша меморандум Астана медициналық университетімен жасалған болатын.